Қазақстан Республикасы Қауіпсіздік Кеңесінің Хатшысы баяндамасында ынтымақтастықтың нақты бағыттарына, соның ішінде терроризм мен экстремизм қаупіне қарсы іс-қимыл саласына тоқталды. Халықаралық террористік ұйымдар өздерінің идеологиясын тарату, қолдаушыларды тарту және елдерімізге кіру үшін күннен күнге күшейіп келе жатқан жаһандық қайшылықтарды, сондай-ақ көші-қон үдерістерін пайдаланатыны атап өтілді. Есірткі контрабандасы және саудасымен, әсіресе, психоактивті заттар мен синтетикалық есірткі құралдарының жаңа түрлерінің таралуы жағдайында бірлескен күрес тағы бір өзекті міндет болып қала береді. Сондай-ақ кездесу барысында өңірдің ақпараттық, экологиялық және су-энергетикалық қауіпсіздігі, көлік-логистикалық инфрақұрылымның орнықтылығы мәселелері қаралды. Орталық Азия елдері және Ресей Қауіпсіздік Кеңестері хатшыларының бірінші кездесуі 2023 жылы маусымда Алматыда өткен болатын.